3 حاجات كنت بحبهم

3 حاجات كنت بحبهم بجنون كانوا مصبرني علي العيشه ومخلين عندي امل في الحياه

هبدأ في سردهم تنازليا

3- المنتخب

 كنت بشوف في انتصاراته الفرحه و الامل و العزيمه وازاي اي شخص يهزم كل الصعوبات ويحقق اهدافه اه هي كوره لكن اللي كان بيتعرضله المدير الفني للمنتخب و بعض اللاعبين فوق الاحتمال يخلي الجبل تحت ضغط ومع ذلك كانوا بيحققوا انتصارات و يقدموا اداء رائع وكانت الصحافه العالميه بتتكلم عليهم ومنتخبات كتير كانوا عايزين يلعبوا مع منتخب مصر منهم منتخب الارجنتين اللي عرض علي المنتخب يلاعبه لكن لضيق الوقت الموضوع مكملش و منتخب انجلترا اللي اختار منتخب مصر علشان مباراه لاستعدادته لكاس العالم كل ده كان بيخليني فرحانه مش عارفه ايه السبب كنت بنسي بعض مشاكلي شويه

لكن

فاجأني المدرب المخضرم الزمالكاوي المحترم ان اختياراته  للمنتخب علي اساس ديني و اخلاقي و المستوي الفني يجي بعد كده ده فسرلي طبعا سبب اختياره لابوتريكه مع انه مصاب واصابته هتستمر 3 اشهر و ماتخلاش عنه الا لما ناديه اعترض علشان يكمل جلساته العلاجيه

حتي المنتخب تم تدينه ولا اعلم في اي ايه قرأنيه او اي حديث نبوي موجود فيه ان الرياضة تبقي متدينه واسلاميه طبعا ده كله حصل بعد لقب منتخب الساجدين اللي معرفش جالنا منين و قضي علي اسم المنتخب ((الفراعنه)) وطبعا افتعال السجود من اللاعبين مثلا لو حد رجع بالذاكره لبطولة 2008 وهدف احمد فتحي الاول في كوت ديفوار اللاعبين بيجروا عليه علشان يحيوه وهو بيزعق فيهم يقولهم اسجدوا اسجدوا وكلهم سجدوا بناء علي اوامر صاحب الهدف

مش فاهمه ليه هو عايز يسجد شئ جميل لشكره لربنا لكن ليه اجبار ناس مش عايزه وطبعا انا لو مكان اللاعبين هسجد علشان منظري قدام الناس محدش يقول مرضيش يسجد و الحكايه اتكررت كتير في اكتر من مباراه في المنتخب و الانديه

لحد ما اخد لقب منتخب الساجدين وانا مش فاهمه الناس مبسوطه اوي كده ليه بالاسم ده هل لانهم بيستعروا من مصريتنا وشايفين ان الفراعنه كفره فيبقي اسمهم الساجدين مين المنتخب اللي في العالم اللي لقبه رمز ديني ده منتخب السعوديه نفسه لقبه(( الخضر)) مش لقب ديني ولا حاجه ومين اللي قال اننا نستهان بالسجده لله ونعملها رمز لشويه ناس في الاول و الاخر بيلعبوا ولو خدانها بطريقة دينيه زي ما الكل بيحب هتبقي سجدتهم حرام ومش مقبوله لان عوره الرجل من السره الي الركبه وهما ملابسهم مش بتبقي ساتره العوره ولا احنا بقينا بناخد بالالقاب و الظواهر و نقول الباقي مش مهم مدام بنكسب فلوس ونخلي البسطاء يدعولنا لاننا منتخب الساجدين المؤمنيين اللي مش بختارنا مدربنا علي اساس لعبنا لا انما علي اساس اننا متدينين اكتر من باقي اللاعبين

دي حاجه خلتني اقفل من ناحيه المنتخب ونفسي يتغلبوا من منتخب مفيهوش ولا مسلم وحصلتلهم كتير علشان يطلع يشرح لينا الشيخ حسن شحاته اسباب الهزيمه اللي طبعا مش هتكون فنيه واكيد هيكون في لاعب مقرأش جزء القرءان بتاع كل يوم

ارفض اني اكون بشجع او بحترم شخص او شئ جماعي يبقي واخد الدين وسيله وغطاء

2- الزمالك

حب نمي جوايا فطريا لاقيت نفسي بحبه بالغرم من ان والدي اهلاوي متعصب بس حبيت الزمالك فرحني كتير و زعلني وبكاني اكتر بكتير وياما حلفت اني مش هشجعه تاني واني مش هشجع كوره بعد كده وارجع في نفس اليوم اللي اقرر في كده احن تاني وارجع تاني لاخبار و حرقه دم نادي الزمالك :@ الا ان اليومين دول بيزيد مش عايزه اقول كرهي قله اهتمامي بالنادي ده بشكل غريب وقفلت من ناحيته اكتر النهارده فشل في الاداره لاعبين بتوع مصالحهم بس جمهور عاشق للي يبهدله بس يكون اسمه كبير جمال حمزه-شيكابالا عمرو ذكي - ميدو) و زاد غضبي من النادي ده النهارده بالذات

قرأت خبر في المواقع الزمالكاوية و اليوم السابع

هروب عبد الرؤوف يعطل انتقال كونيه للزمالك

ومضمون الخبر ان الزمالك اتفق مع اداره الانتاج الحربي علي اعاره بوجي و عبد الرؤوف +300 الف دولار في مقابل الاستغناء عن كونيه وان الصفقه تتعطل علشان عبدالرؤوف مش عارفين طريقه فين

لعبه جديده من العاب مجلس الاداره علشان يداري فشله في جلب لاعبين جدد للفريق في فتره الانتقالات الشتوية و تحميل الليله كلها لواحد غلبان ياما تحمل هو عبد الرؤوف

حملوا عبد الرؤوف من قبل نتائج الفريق السنتين للي فاتوا مع ان الفريق كان واقع بقاله 6 سنين

حملوا عبد الرؤوف اننا وصلنا الموسم الماضي للمركز 11 ونهينا الموسم في المركز 6

حملوا عبد الرؤوف وصول الزمالك للمركز 14 الموسم ده

حملوه لوحده كل شئ في الفريق وطبعا جمهور الزمالك زي ماقلت بيحب اللي يبهدله ويكره المحترمين فطبعا كميه سباب وتريقه لعبد الرؤوف في المباريات و المنتديات محدش يتخيلها ناسيين انه بشر زيهم ومش هيقدر يلعب ولا يبدع في جو الارهاب ده

اخدوا منه كل الحق في المبررات اللي بيعطوها لغيره فشيكابالا لما يشتم الجمهور اكتر من مره ويرفع حذائه في وجه جمهور الزمالك في التدريبات او لما يتمرد علي الفريق او لما يلعب بمنظره ويتسبب في سوء مستوي الفريق بانانيته كل ده ليه مبرر عند جمهور الزمالك انه لسه صغير ومحتاج اللي يحتويه

وعبد الرؤوف اللي مركزه لازم يكون اللي بيلعب فيه خبره او علي الاقل يكون حد بيلعب جنبه خبره يقدر يتسند عليه ويتعلم منه لحد مستواه مايعلي و بالرغم من صغر سنه عمري ما سمعت كلمه اصله صغير ومحتاج حد يحتويه بالعكس بلاقي جمهور الزمالك بنتظر غلطه منه ويشوفوها في الدقيقه الكام ويفضلوا يشتموه عليها لمده موسم اللاعب الوحيد في تاريخ متابعتي لكره القدم اللي شايفه جمهور الزمالك بيفتكرله اخطاؤه بالدقيقه و الثانيه  من اول مباراه لعب فيها ومع ذلك الولد محترم ومؤدب وعمره ماغلط

طبعا اداره نادي الزمالك عايزه تهرب من الفشل في عدم اتمام صفقات فتحول الموضوع لحيطه الزمالك المايله - احمد عبد الرؤوف- علشان الجمهور ينسي ادارته الفاشله اللي مش قادره تدفع 200 الف دولار ومش قادرين يجيبوا لاعبين للاعب معروف انه مهما اتشتم ومهما اتهاجم مش هيتكلم لانه بيحب النادي في حين ان نجم النجوم الاسطوري اللي اتعملته احتفالات اسطورية ميدو اعترف ان الزمالك كان كوبري للمنتخب وخلاص عايز يرجع للاحتراف تاني محدش قال عليه حرف واحد ولو حد فتح بقه يبقي ممكن يتقتل من عشاق ميدو

حسيت بالظلم الشديد في نادي بحبه وانا اكتر شئ بكرهه هو الظلم لو كان ظلم من الاداره او مدرب للاعب كنت هقول معلش مفيش حاجه كامله لكن يبقي ظلم من ملايين الناس لا يبقي مش هقدر استمر في حب نادي ظالم بيطالب بالعدل

رقم 1 عايزه رغي منفصل