الاتحاد المصري للكوسه ( للكره سابقا)

دائما يتحفنا اتحاد الكره الكوسه بقراراته المثيره للاشمئزاز و الحيره في ان واحد

 فبالرغم من اعتراف اتحاد الكوسه بالخطأ واقالتهم لرئيس لجنه المسابقات نايف خايف عزت

الا انهم يعتمدون نتيجه مباراه الزمالك و حرس الحدود اي انهم يعترفون بالخطأ ويعاقبون من ارتكبه

وفي نفس الوقت يباركون نفس الخطأ

نعم فطرف القضيه هنا نادي الزمالك وليس نادي اخر معروف للجميع

فاعضاء اتحاد كره القدم لا يبخلون بمجهوداتهم في عرقله الزمالك ومنهم من يحلف لاصدقائه انه طالما هو متواجد داخل جدران اتحاد الكوسه لن يري جماهير الزمالك بطولة

واكد هذه المقوله اربعه اشخاص ( الملحن عزيز الشافعي - الصحفي محمد سيف - الفنان سامي العدل - المهندس رؤوف جاسر)

فنراهم لا يبخلون علينا بقراراتهم او بعقوباتهم لعرقله الزمالك ودائما مع الاهلي هم

 و اخرها هو القرار باعتماد نتيجه حرس الحدود و الخطوه القادمه هي مساوامه نادي الزمالك للاستغناء عن حقه في المباراه لرفع العقوبة عن ابراهيم حسن

وبالنظر للقرار من زاويه اخري فاعتماد نتيجه حرس الحدود و الزمالك هي البالون الذي يقوم اتحاد الكوسه باطالقه في الهواء

لينشغل به العامه و البرامج الرياضيه هو يقومون بباقي اعمالهم المشبوهه في خدمه النادي الاحمر دون ان يعترض احد او يلتفت اليها احد

في نفس اعتماد اعاده قرار الاستبدال في يناير الامر الذي قام بالغاؤه اتحاد الكره في بدايه الموسم وذلك لمساعده النادي الاحمر في استغناء عن لاعبيه الضعفاء واستبدالهم بالعبين اقوياء ليستحوذ علي الكره المصريه ويظل هو الفريق الاوحد و يضعف باقي انديه الدوري كما فعلوها من قبل من 5 سنوات وحتي يقولون انهم لا يفعلونها من اجل عيون بني حُمر قاموا بادخال انديه اخري معه تطالب باعاده قرار الاستبدال وهي انديه داعمه من الدرحه الاولي للنادي الاحمر (انبي - بنروجيت)

فالجميع الان منشغل بقرار اعتماد المباراه ولا احد مهتم باعاده الاستبدال وعندما ينتهوا من مشكله المباراه سيجد الجميع نفسه امام الامر الواقع و تم تنفيذ قرار الاستبدال ويعود الدوري الي سابق عهده يستحوذ الاحمر علي اقوي لاعبي الدوري ويترك لباقي الانديه فتات اللاعبين ليظل النادي الاحمر هو المستحوذ علي كل شئ ويظل اعضاء اتحاد الفراولة سعداء ويغني ويهلل مطربهم الفذ سعد الصغنطط الاهلي في كل حته عمال يجيب اجوان - مش مهم ازاي المهم ان هو بيجيب وخلاص- ويظل اتحاد الكره ينشر الفساد في الوسط الرياضي الكروي المصري فانا لا اعلم في اي بلد غير بلدنا يدار اتحاد كامل للعبه لمصلحه نادي واحد فقط وليس اللعبه وتفصيل قرارات و عقوبات علي مقاس صاحب الجلاله النادي الاحمر غير عابئين بمصلحه باقي المنظومه فالمهم و الاهم هو النادي الاحمر و النادي الاحمر فقط لا غير 

ولك الله يازمالك ولك الله يامنظومه كره القدم في مصر

احترموه اولا ثم طالبوا باحترامه

استيقظ يوميا قبل صلاه الفجر و اجلس في الشرفه في محاوله للجلوس مع النفس و الاستمتاع بالهدوء وبنسيم الصباح

وافاجأ يوميا برجل لا اعلم هل هو ذاهب الي عمله ام اتي منه ويمسك بهاتفه في يده وينطلق منه صوت القرءان الكريم

ولا اعلم لماذا يوميا عند مشاهدتي لهذا الرجل اتذكر كيف انقلب المجتمع علي الفتاه الالمانيه التي اهانت القرءان الكريم

و المظاهرات و احلال اراقه دمها من الازهر و المطالبه بمعاقبتها دون ان يحاولوا افهامها ومناقشتها ةهذا لا يهمني الان

ولكن ما يهمني هو الانفعال الشديد من قبل البلاد الاسلاميه و بالاخص مصر لاهانه القرءان الكريم من فتاه غير مسلمه وهم يهنيون القرءان نهارا جهارا ولا ينتفضوا لمطالبه انفسهم باحترامه

فبالنظر الي مايفعله المصريون بالقرءان الكريم لان نري اي احترام لهذا الكتاب المقدس الذي يجب احترامه ووضع في اعلي مكانه

1- نغمات الموبايل ايات قرءانيه

فعند اتصال شخص يشتغل القرءان الكريم خارجا من الهاتف في اي مكان حتي وان كان في الحمام وعندما يرد الشخص يقوم باقتطاع ايات الله حتي يرد علي المتصل (( هل هذا احترام للقرءان))

2- القرءان في وسائل المواصلات

في زحمه الشوارع و دوشه المواصلات مجد سائق السياره يقوم بتشغيل القرءان الكريم ويقوم بتعليه الصوت و من في السياره غير مبالين به ويتحدثون يرفعون صوتهم ليتحدثوا فتعلوا اصواتهم صوت تلاوه القرءان الكريم فيتوه القرءان بين اصواتهم العاليه ويتحدث السائق مع من جانبه والقرءان مازل يُتلي واكبر اهانه للقرءان عندما يسب السائق سائق زميله يمشي بجانبه وهذا يحدث اثناء تلاوه القرءان

3-القرءان في الاسواق و المحلات التجاريه

ينتشر تشغيل القرءان في المحلات التجاريه و الاسواق و فيها لا احد يكترث ابدا للقرءان فالبائع و المشتري مشغولان بالبيع و الشراء و اصوات الناس عاليه تتكلم وتشتري وتتفرج علي المعروضات وتتناقش و القرءان صوته ضائع فصوت تلاوه القرءان موجود ولكن هل احد يكترث له

4- اكثر ما يؤلمني ان البعض يجعل البعض يتأفف من القرءان ففي اي مكان يقوم صاحبه بتشغيل فيه القرءان الكريم يقوم بتشغيله بصوت عالي جدا بعض الناس لا تتحمله و بالاخص في وسائل المواصلات فالناس تعود من عملها بعد يوم طويل من العمل محملين بالتعب و الهموم واحيانا لا يتحملون اي صوت فيفاجأوا بالسائق يشغل القرءان بصوت عالي فيطالبون منه خفض الصوت قليلا ولكنه يرد عليهم رد واحد كل السائقين يحفظونه " حرام عليكوا ده قرءان انتوا ايه كفره لو كان اغاني مكنتوش هتقولوا كده " والناس تتأفف من الصوت العالي لانهم مرهقين ولا يطيقون اي صوت

5- قراءه القرءان في الاماكن المزدحمه

اكثر ما يستفزني ان في وسائل المواصلات يقوم رجل او امرأه باخراج مصحف وقراءه القرءان وسط الدوشه و الرغي واوقات اصوات الاغاني العاليه فماذا سيستفيدون او ماذا سيفهون من ما يقرأون

فهل هذه النماذج المنتشره بين الجميع في مصر هي من احترام القرءان

فاكبر اهانه له هو اهمال القرءان الكريم وهم يظنون انهم يقدسونه فهم نسوا ايه مهم نزلت في القرءان ولكنهم لانهم لا ينصتون ولا يركزون تاهت منهم

"وإذا قرئ القرآن فاستمعوا له وأنصتوا لعلكم ترحمون"

استموا و انصتوا

يعني ليس في اي مكان ولكن في هدوء وتركيز لتسمعوا وتركزوا وتفهموا

وما المني اكثر ان احد البائعين كان يتحدث مع شخص وبجانبه القرءان الكريم يُتلي انه لا يستطيع سماع اغاني ام كلثوم الا وهو يجلس وحده في بيته في هدوء ليتمتع بصوتها وبالحانها وبكلمات اغانيها

هل اصبحت اغاني ام كلثوم او اي مطرب او مطربه اعز علينا من القرءان لنحترمه كما نحترم المطربين

فانا تربيت علي ان القرءان شئ لايمكن المساس به او اهانته عند تشغيل القرءان ممنوع صوت يعلو صوت القرءان

فاهانه القرءان الكريم في بلدنا غير مقصوده ولكنها نابعه من ثقافه التدين الظاهري الذي نعيش فيه فالاهم ان يراك الناس تقوم بتشغيل القرءان  وليس المهم انت تستمع له

فانا اطالب مسلمين مصر ان يحترموا القرءان اولا قبل ان يخرج الينا شخص اخر من الغرب يهين القرءان فنطالبه باحترامه

ففاقد الشئ لا يطالب الاخرين به

هل الدين يعيق العلم

نا لا اقصد الدين بالعكس فالدين الاسلامي يحثنا علي العلم وطلبه ونشره وكان في العصر الذهبي

للاسلام علماء كثيرون قدموا للبشريه اشياء كثيره ولكن الذي اقصده هو طريقه تفكيرنا في الدين

هل تفكيرينا في الدين يعيق تفكيرنا العلمي هذا هو السؤال ؟

شاهدت مجموعه من الافلام الوثائقيه احداها عن الغلاف الجوي و الاخر عن نشأه الارض و الاخر

عن الظواهر الطبيعيه ووجدت ان الغرب لا يترك شيئا الا ويريد معرفته وتحليله علميا ليتعرف علي
الكوكب الذي نعيش ويعرف كل ما يحدث من حولنا اما نحن

فنكتفي بعده اجابات علي اي سؤال يتعلق بالكون

الله اعلم - ربنا عايز كده
لا نحاول ان ندرس او نحلل او نفكر او حتي نتخيل

فعندنا الزلازل و البراكين و الاعاصير هي عقاب من الله

كيف تمت او لماذا في هذا التوقيت بالذات انفجر البركان او هب الاعصار

الله و اعلم او ربنا عايز كده ربنا عايز عقابه يبقي في الوقت ده

نشأه الارض و تكونها و الغلاف الجوي و و و تكون الاجابه سبحان الله الله خلق الكون في سته ايام

نعم فسبحان الله الذي خلق لنا كل هذا ولكن هل يتعارض ايماننا وتسبيحنا بالله مع تفكيرنا وبحثنا

عن نشأه الارض مثلا فالله يسبب الاسباب لماذا نحن لا نحاول ان ندرس الاسباب

اثبتت كل الابحاث ان الارض كانت قاره واحده ثم حدثت عده انقسامات حتي وصلت لما نحن عليه

الان فهل هذا يتعارض مع "سبحان الله " انا لا اراه يتعارض ولكن الكثيرين من المسلمين يرون

ان هذه الطريقه في التفكير تتعارض مع ايماننا فيرون لاننا مسلمون لا يجب علينا اتباع الكفره في

تفكيرهم فكل شئ حدث ويحدث وسيحدث هو بامر الله فالله يقول للشئ كن فيكون فالتفكير العلمي في

ذلك هو كفر لاننا نقول ان الله غير قادر علي فعل شئ ولكني اراه العكس تماما كلما حاولنا البحث و

الاكتشاف نتعرف علي الله اكثر وعلي قدرته اكثر و اكثر

ولكننا حبسنا انفسنا داخل دائره الدين وجعلناه يتحكم في كل شئ في حياتنا

فالفرق بيننا وبين الغرب انهم جعلوا الدين في مكانه الطبيعي وابعدوه عن الحياه وهذا ليس تقليلا من

الدين كما يعتبر البعض فالدين منزلته عاليه جدا وان تدخل في الحياه ستقل منزلته كما يفعل البعض

في العالم العربي من التجاره بالدين علي شاشات التليفزيون فالدين مكانه القلب وان خرج من القلب

فاصبح للتباهي و للتقييد فاذا كان الدين في القلب صحيحا فسنفعل كل ما لا يتعارض معه فوصلنا الا

اننا اصبحنا متديين ولكن في الاشكال و الافعال الهامشيه التي لا تفيد ولا تضر

فوصلنا الي ان يخجل الكثير من المصرييون من كوننا فراعنه لان الفراعنه كانوا كفارا في وجهه

نظرهم ويحاولون بشتي الطرق ان يمحوا مصر الفرعونيه من ذاكرتهم حتي انهم قاموا بتغير لقب

منتخب مصر من متخب الفراعنه الي منتخب الساجيدن في حين ان العالم كله مبهور بالفراعنه وفي

نفس الوقت الذي اكتشف العالم مياه علي سطح القمر نحن نكتشف فوائد الحجاب للشعر وفي الوقت

الذي يحارب العالم فيه ويحاول ايجاد حل في الاحتباس الحراري نحن نحارب من يأكل بيده اليسري

و نحاول اكتشاف حل للسؤال الصعب باي قدم ندخل الي الحمام وباي قدم ننزل من علي السرير

ووصلنا الا ان الالاف يتظاهرون للضغط علي مؤتمر المناخ لانقاذ البيئه ونحن نتظاهر ونبكي

ونسب ونلعن بسبب منع النقاب من جامعه القاهره

فهل هذه الحياه التي يريدها مننا الله فهل هو الدين الذي اوصلنا لهذا ام انها طريقه حياتنا؟؟

 هم يتظاهرون لانقاذ الارض

ونحن نتظاهر لــ

ميني و الاشباح

في احدي حلقات مسلسل العياده جلس الدكتور صلاح ممسكا بمجله ميكي وهو يتغزل في جمال ورقه ميني ويعاتب ميكي لانه حتي الان لم يتزوجها ويفتح المجله وينظر في اول صفحه ويقرأ اول سطر ثم يتسائل في عصبيه "فين ميمي؟" وظل يقولها بعصبيه وهو يقلب صفحات المجله حتي وجد ميمي وابتسم ابتسامه رضا وظل ينظر اليها

مشهد مضحك يعبر عن شاب يرغب في الزواج ولكنه خجول ولا يجد فتاه يتزوجها

ولكن المشهد يعبر عن الكثير من الشباب المصري و بالاخص المسلم الذي اصبح يثيره ويلفت انتباهه اي شئ -مؤنث- حتي وان كانت شخصيه كرتونيه مرسومه علي الورق

فاصبحوا يُثارون من شنط اليد و الاحذيه وحتي الوان الملابس

فاحد المتصلين باحد الشيوخ الفضائيات يقول له "بالله عليك ياشيخ تكلم اخواتنا اللي بيبقوا لابسين احمر واخضر و الوان"

لهذه الدرجه اصبح تفكير اغلب شبابنا اصبحوا يثارون من رؤيه اصبع او خصله شعر او شنطه او حتي قطعه قماش ملونه فماذا يفعل رجالنا المغلوب علي امرهم ويُثارون من اقل شئ وهم في نفس الوقت مطالبون -شرعا- بغض البصر كيف سيحموا انفسهم اذن فهيا الي بناء مدينه الاشباح ترتدي النساء في المدينه الاسود في الاسود فهو لون قاتم لن يتحمل احد النظر اليه ويغظوا وجوههم حتي يظهوروا امامنا كأنهم اشباح فلا نطيق النظر اليهم ونحمي انفسنا من الفتنه فتحول النسبه الاكبر من شباب مصرمتدينين وغير متدينين الي الدفاع عن مدينه الاشباح مدينه بلا روح بلا حياه اجساد مغطاه بالاسود تجوب المدينه لا توجد احاسيس ولا مشاعر فلا يري احد الاخر ولكن الاهم عند شبابنا هو حمايه انفسهم من الفتنه وغض البصر _(بالعافيه)

فنسي او تناسي المدافعون عن مدينه االاشباح ان الوجه ليس مجرد لوحه جميله ينظرون اليها ويتلذذوا بها فالوجه يحمل بين طياته كل المشاعر الانسانيه فنستطيع ان نتعرف علي الشخص من عينه ونكتشف بعض سماته من نظره عينه ونعرف اذا كان سعيد ام حزين مهموم ام راضي كاذب ام صادق

"فانا كنت ارفض الحديث مع اي شخص يرتدي نظارات شمسيه وكنت اطلب منه/منها ان يخلعها حتي اري الوجهه بالكامل واري تعابير الوجهه"
ولكن في مدينتنا الجديده مدينه الاشباح فلا مكان ولا تهم المشاعر الانسانيه ولا يهم الصدق او الكذب ولا يهم نعرف مع من نتحدث ولا يهم نواسي الناس في همومهم فكنا عندما نري اي سيده ترتدي اسود في اسود نفهم مباشره انها لديها حاله وفاه في عائلتها ونذهب لمواساتها ولكننا في مدينتنا الفاضله لن نعرف لاننا كلنا سنرتدي السواد فهذا ايضا لا يهم طالما ان شبابنا راضي و ويغض البصر

ونسوا او تناسوا ايضا ان الملابس ليس مجرد قطه قماش يتم وضعها علي الجسم ولكنها لغه

و المثير للضح ان الشباب يدافع عن العفه - علي حد قولهم -وهم غارقون في بحر الرذيله فاحد المدافعين عن النقاب وكان دائما يدعو لي بالهدايه و احيانا يسبني وهو اجده هذه نوعيه الجروبات المشترك بها اماكن للتعارف لراغبي العلاقات المحرمه
واخر الذي يراني كافره لاني ارفض النقاب و اقول ان الحجاب عليه اختلاف يحكي لي عن صديقته وكيف كان يعيش معها حياه زوجيه كامله ويطلب مني ان اعيش التجربه معه

فهذه هي مدينه الاشباح مدينه مغلفه بالسواد حتي يعمي السواد نظر الناس ولا يرون ما يحدث بداخلها وللاسف البنات يسيرون خلف الشباب كقطيع من الاغنام او الببغاوات يرددون مايقال لهن كصدي الصوت الحجاب فرض " الحجاب فرض الحجاب فرض"

حجابنا حريتنا فيرددن"حجابنا حريتنا ..." النقاب عفه " النقاب عفه النقاب عفه"

ودخلنا الي دوامه لا نعلم متي سنخرج منها

فالجهل وصل الي كل العقول بعدما كان قاصر علي الاميين او اصحاب المؤهلات المتوسطه الان اصبحنا نري ان من يدافع وينادي بالتخلف هم اطباء ومهندسين ويكفي طالبه كليه الطب التي تشتكي وزير التعليم العالي لانه منع النقاب في المدينه الجامعيه فهل سألت نفسها قبل ان تدخل كليه الطبل كيف ستمارس عملها بالنقاب؟

لا يهم المهم العفه فشبابنا ترك فروضه ودراسته وانشغل بجسد المرأه وكيف يقوم بتغطيه جسدها

فتدمرت عقول الشباب قبل الكبار فالناتج يكون جيلا اشد تطرفها يتمسك بمدينه الاشباح علي انها هي مدينه العفه

فعلي الجانب الاخر السعوديه المروجه للنقاب افتتاح جامعه مختلطه يسمح للفتيات بداخلها لقياده السيارات و عدم ارتداء العباءه السوداء

فاختيار مكان الجامعه لاباحه اشياء كهذه غريبه علي المجتمع السعودي هو محاوله للتأثير علي عقول الشباب من الجنسين لتكون الاجيال القادمه اقل تطرفا وتشددا فهم يخرجون من مدينه اشباحهم بالشباب ونحن نهرول اليها بالشباب

جارتي منقبه من حقها

* قبل كل شئ انا ضعيفه في القواعد النحويه حتي لا اجد من لا يعلق علي كلامي ويلتفت فقط لاخطائي النحويه

لان الكل يتحدث عن موضوع النقاب و كل المؤيدين له يقولون انه حريه شخصيه تذكرت جارتي المنقبه

التي منذ ان انتقلنا الي منزلنا هذا لم اري وجهها ابدا ولم اعترض

ففي اثناء حديثي مع اخي وهو لا يري فرضيه النقاب ولكنه يراه حريه شخصيه

وجدتني اضرب مثلا للحريه الشخصيه في النقاب بجارتنا هذه

فهي لاتعمل لاتخرج من بيتها الا للضروره او لتقضيه طلبات بيتها

او تجلس في محل صغير ملك لزوجها اسفل منزلها ولم اراها ابدا مرتديه السواد ولم اراها تغطي عيناها ولا يدها

فالكل اذن يعرفها ان غالطت احد في حساب شئ او ماشابه الكل يعرفها ويعرف مكانها ويعرف طريق الوصول اليها

هذه اذن حريتها الشخصيه لانها لم تتعدي علينا لاننا نعرفها

ولكن كيف يكون النقاب حريه شخصيه لامرأه او لفتاه اختارت ان تخرج من منزلها كل صباح لمخالطه الالف من البشر في المصالح وفي الجامعات و المدارس

كيف يكون حريه شخصيه عندما اذهب الي مصلحه حكوميه واتعامل مع سيده لا اعرفها وعندما تقول ليه "فوتي علينا بكره" "او يكون هناك غلطه ما " اذهب في اليوم التالي ولا اجدها واسأل اين السيده المنقبه التي كانت في هذا المكتب فيجيب علي احدهم اي واحده فهناك امرأتان منقباتان في هذا المكتب فبماذا اجيب

كيف اذهب الي مستشفي تمرضني او تعالجني طبيبه او ممرضه منقبه كيف سأأمن علي نفسي او علي عائلتي

فهي علي اسوأ تقدير لن تكون معقمه حتي ملابسها تنقل الكثير من الاتربه و الميكروبات - مع العلم حتي في البلاد التي جاء منها النقاب في المشتسفيات الطبيبات و الممرضات يرتدين الملابس المعروفه في العالم كله داخل المستشفيات- ماذا ان حدث خطأ طبي ماذا سأقول الطبيبه المنقبه ام الممرضه المنقبه

كيف سأأمن في مدرج الجامعه عندما اري شئ اسود يجلس بجانبي وفي زحمه المدرج يلتصق بي كيف اعرف انها فعلا فتاه ام شاب يستغل هذا الزي لينحشر بين الفتايات

منذ عده اشهر كنا نسمع عن خطف الاطفال وسمعنا علي القبض علي رجل يحاول خطف طفل وهو يرتدي زي نقاب وكانوا يظنوه سيده عندما رأوه وعندما صرخت ام الطفل جروا ورائه وهم يظنون انه سيده ولكن ظهرت المفاجأه فهو رجل يرتدي النقاب

وفي نفس الايام صديقه خالتي عائده من عملها تجد شئ اسود يحاول خطف ابنها - فانأ اقول شئ لان لا احد يعمل ما يوجد تحته رجل ام امرأه

ومنذ عده اشهر ايضا في شارعنا - اي ان الحكايه ليست كلام جرائد- قتل جواهرجي واجمع كل الشهود ان اخر من دخل عليه كانوا امرأتان منقبتان قبتان بعدما خرجا مباشره دخل عليه وجدوه مقتولا فكيف ستستدل لشرطه علي القاتل وهو تحت زي اسود لا تظهر منه ملامح

وفي احدي البلدان العربيه علي ما اتذكر تونس تم القبض علي رجل يرتدي النقاب ليدخل الي المكان المخصص للسيدات في المساجد ليستغل انشغالهن بالصلاه ويسرق امتعتهن

وكم من حادثه وكم من قصه وكم من هارب من العداله كان بطلها النقاب

فانا اريد ان اوضح ان النقاب ليس حريه شخصيه الا لمن عزلت نفسها عن المجتمع ولمن ارادت الاختلاط بالمجتمع عليها احترام الحريه الشخصيه للاخرين

"فحريتك الشخصيه تنتهي عندما عندما تبدأ حريه الاخرين" فحريتك ان تغطي وجههك وانا حريتي ان اري وجههك

فكثير من المؤيدين للنقاب يقولون جمله واحده - كأنهم حفظوهالهم-

1-الاولى محاربه المتبرجات وانا ردي المتبرجات ماخفوش هويتهم عن الناس لو واحده سرقتك هتعرف تقول اوصافها مش هتقول واحده لابسه نقاب

2-فهم يريدون المايوه و الميني جيب و يحاربون النقاب وانا ردي والنبي فين المايوه و الميني جيب اللي بتقولوا عليهم والله فعلا حافظين كلام من شيوخ الفضائيات مش فاهمينه هاتولي واحده في الجامعه ولا في شغلها بالوصف الي انتوا بتقولوا عليه ده ده اولا

ثانيا بقي مين اللي قال للمنقبات يقلعوا هدومهم كل اللي بنطلب بيه الوجهه مش اكتر ولا حد قالهم اقلعوا اكتر من كده - لو ده يعني كان اسمه قلع-

3- مطالبتهم بنساء للكشف عن هويه المنقبات وانا ردي لا لا لا لا والف لا مش هنتحول زي السعوديه النهارده يطالبوا بنساء للكشف عن المنقبات بكره يطالبوا بجامعات ومصالح خاصه بالنساء فقط بعده باسواق خاصه بالنساء وفي لمحه بصر نبص نلاقي نفسنا بقينا السعوديه رقم 2

بكل الشذوذ اللي في مدارس البنات و مدارس الشباب و اغتصاب الاطفال وكل ده عندهم اهون من ان الاختلاط لا والف لا مش هنتحول كده ابدا و اللي مش عاجباه مصر وعايز السعوديه يروح هناك يتجلد براحته ويسيبنا

خلاصه القول اهلا بكل منقبه مثل جارتي

من اجمل التعليقات التي قرأتها في موضوع الحريه الشخصيه في النقاب

" الكيل ب 1000000 مكيال
بواسطة: عبدالحميد

بتاريخ: الجمعة، 16 أكتوبر 2009 - 18:37

بيقولك "عنصرية" اشمعنى دلوقتي بقت عنصرية و لما 99% من المجتمع بينظر لغير المحجبة على انها و لا بد إمرأة غير فاضلة-طبعا دا اللفظ المهذب- تبقى دي مش عنصرية و لا هي العنصرية لما حد يمنعكم انتم لكن لما انتم تقترحوا منع المتبرجة -من وجهة نظركم- من دخول اماكن معينة تبقى دي مش عنصرية.

بيقولك "حرية شخصية" دلوقتي بقينا نتكلم على الحرية الشخصية و لما واحدة محجبة -أو غير محجبة- ترفض النقاب ا-و الحجاب- من نفس المبدأ تبقى عاصية و مفتونة و من هواة التغريب و غيرها من التهم المعلبة الجاهزة.

معظم المنتقبات بينظروا لغير المنتقبة-خصوصا الغير محجبة- على انها عاصية و غير محترمة و بينظرولها نظرة دونية من المنطلق دا فمحدش بقى يشتغلنا و يقعد ياكل دماغنا ان احنا بننظرله على انه فضيلة و زيادة في الحشمة و الاسطوانة المشروخة دي.

وبعد كدا يقولك الغرب بيكيل بمكيالين , الغرب صحيح بيكيل بمكيالين بس احنا بقى جامدي قوي و بنكيل ب 10000000 مكيال .

السادس من اكتوبر نصر الحرب و هزيمة المجتمع

اليوم هو نصر اكتوبر العظيم علي قدر حبي وتقديري لهذا اليوم وهذا الانتصار التاريخي علي قدر كرهي الكبير لهذا الانتصار
ليس حزني علي تحرير ارض بلادي 0وتلقين اسرائيل درسا في المعني الحقيقي للحرب و المعني الحقيقي للسلام
ولكن حزني علي مجتمع تبدل وتغير 180 درجه للاسوأ بعد الحرب و المفترض ان يكون العكس
لا اقصد الاوضاع الاقتصاديه ولكني اقصد الاوضاع الفكريه و الثقافيه
ولعل ما اقصده اكثر هو موضوع يشغلني بشده وهو معامله المرأه في المجتمع
فبعد هزيمة 67 وفي وسط انشغال الشعب باكمله بالحزن علي هذه الهزيمه التي لن يمحيها الزمن من ذاكرتنا
خرج علينا بعض المتأسلمون يوحون بان اسباب الهزيمة هي السفور و العري و عدم الالتزام بتعاليم الدين الاسلامي وان كلما زادت اعداد النساء في التعليم و العمل و ارتداء الملابس الغير محترمه ستحل علينا الهزائم من كل صوب وحدب
ولكن دعوتهم لم تأتي بثمار لانهم كانوا يدعوا علي استحياء لان الرئيس جمال عبد الناصر كان يرفضهم بشده وهذه واحده من محاسنه
ولكن بعد نصر اكتوبر 73 و اثناء فرحه الشعب كله بالنصر
اعطاهم الرئيس انور السادات الحريه في التعامل ونشر فكرهم في البلاد للقضاء علي الشيوعيه
ظننا منه انهم افضل في المجتمع من الشيوعيين
وبدأوا مره اخري في مخططهم وكأن كل هدف المسلمين في الحياه هو تحقير المرأه
فبدأت الدعوي للرجوع للدين و ارتداء المرأه للحجاب لانه هو رمز التدين
حتي يبعد الله عننا وعن بلادنا كل الشرور لم يلتفت لهم في البدايه الكثيرون
من التفت لهم اعداد قليله جدا ولكن لان كما يقول المثل الشعبي " الزن علي الودان امر من السحر " فبدأ يستمع لهم الناس وكل شخص يبدأ في محاسبه نفسه ويبدا ان يعامل نفسه علي انه سبب البلاء الذي كان يحل في البلد
وبدأوا في السير خلفهم ومازالوا يسيرون خلفهم ظنا منهم ان طريقهم هو االطريق الصحيح الي الجنه
وظلت الدعوات بتحقير المرأه التي تأتي من الخليج مستمره و الشعب المصري يمشي ورائها
وما زاد الطين بله هو اعداد المصرين الذين كانوا يسافرون للعمل في الخليج ويعودون محملين بالهدايا في الحقائب و الاموال في البنوك و الجهل في العقول - انا لا اعمم اتحدث علي الفئه الاكبر- وكل منهم يذهب بزوجته الي الخليج مرتديه فستاناً جميلا مزكرشا وملونا و يعود الي مصر وهو يجر خلفه شئ اسود في اسود لانها عوره ولانه سي السيد ويعودا الاثنان بمحملين بقشور الدين من الخليج
المرأه عوره - صوتها عوره - وجهها عوره في فته سبب المصائب في الحياه
وانهار من الكلمات التي تحقر المرأه وكل منهم يغني ويتغني امام اقاربه بالتزام بنات الخليج وحشتمهم ووقارهم وتدينهم وليس مثل بنات مصر الفاجرات المتبرجات - المثقفات -وبدأ المجتمع المصري الدخول في عمليه غسيل المخ
وبدأت ترضخ العقول وبدأ اختزال التدين و الاحترام في قطعه قماش توضع علي الرأس
وبدأت كل امرأه وكل فتاه احتقار نفسها لانها امرأه كل الذنوب تقع عليها فهي سبب الحروب وهي سبب الفساد وهي سبب كل شئ في المجتمع
وبدأ يتسرب الحجاب الي مجتمعنا شيئا فشيئا حتي وصل الان ان اكثر من 90% من نساء وفتايات مصر محجبات
ولكن مايلفت نظري كثيرا ان نسبه ارتداء الحجاب زادت في الاطفال وفي مرحله الابتدائي و الاعدادي و الثانوي فانا اتذكر عندما كنت في المرحله الثانويه من7 سنوات كانت في المدرسه عدد المحجبات يعد علي الاصابع وكان لايوجد محجبات في الابتدائي او الاعدادي وكانت كل فتاه تقول لن ارتديه الا بعد الزواج
ولكن الان تحكي ليه ابنه خالتي عن مدرستها - فهي في الصف الثالث الاعدادي ومنذ ان كانت في المرحله الابتدائيه وهي تقول ان هناك مدرسا يلزم الطالبات بارتداء الحجاب حتي وصل ان العام الماضي كان الفضل المكون من 20 طالب وطالبه كل الطالبات به محجبات ماعدا هي وطبعا فتاه مسيحيه معها فكان كل حصه لهذا المدرس يوقفها ويعاملها معامله سيئه حتي ترتديه حتي واجههته انا لن ارتديه الان قال لها كل زميلاتك يرتدوه فارتديه انت ايضا علي سبيل الموضه فرفضت فحتي الان تعامل معامله سيئه من هذا المدرس؟؟
وهناك فتايات في مرحله الحضانه يرتدين خمار و حجاب و عبايات مثل التي ترتديها النساء اذن اصبح الاحتقار و اعتبار ان المرأه عوره وصل للاطفال
ومايزيد الامر خطوره الان ان كل فتاه عندما يعاكسها شاب مهما كانت درجه احترامها في ملابسها تجري مسرعه اللي نفسها لتري ما الخطأ فيها لجعل الشاب يعاكسها وتبدأ تلوم نفسها لانها ارتكبت ذنب وهو ان عاكسها شاب
وماهو ذنبه؟ لا يوجد له ذنب لاني انا التي ستتحمل ذنبه؟ هذا ما اتي به شيوخ الفضائيات وشيوخ السلفيه الي بلادنا




ولحديثي بقيه....

مـــن مـــخلفات المــلكــ

مره من المرات القليله التي بكيت فيها بسبب كره القدم
المكان : امام شاشه الكمبيوتر الزمان : 4-10-2009 8.00صباحا السبب : تقرير منتخب مصر للشباب في برنامج الملاعب اليوم "احمد شوبير"
التقرير كل الجهاز الفني للمنتخب المصر ولاعبين المنتخب بيحاولوا يرفعوا من الروح المعنوية لـ محمد طلعت او ابو ضفيره كما اطلق عليه الصحفي اللامع " محمود معروف

"
محدش منهم افتكر يهني بوجي علي الهدفين اللي بسببهم مصر صعدت لدور الـ16 محدش افتكره حتي لدرجه ان لاعب من اللاعبين قال " محمد طلعت هداف كبير في غيره جاب جونين وهو جايب جون واحد بس بردو هو هداف كبير"
في غيره كأن اللي غيره دول من منتخب تاني وبتصارع هو وهما علي لقب هداف البطولة وطبعا يقصد بالغيره دول "بوجي - حسام عرفات


"
اكيد ميقصدش احمد شكري

محدش عاتب ابوضفيره علي علي انه مفرحش لمنتخب مصر لما بوجي احرز هدفين محدش عاتبه انه زعلان علي مجد امنتخب وكان عايز مجد ليه لوحده حتي لو علي حساب المنتخب
بوجي اللي بسببه صعدنا للدور الـ16 الكل ناسيه بوجي اللي كل ذنبه انه اختار الزمالك فوق الاهلي

بوجي اللي اتظلم من ساعه ما وقع للزمالك وقعد احتياطي كان هو السبب في صعود مصر اصلا لكاس العالم
الكل بيقطع فيه وعايزينه يتعاقب علي رد فعل طبيعي عمله بعد هجوم الجمهور عليه وعلي نادي الزمالك وهو بيسخن
انا مش بدافع عن شتيمته انا شايفه انه لازم يتعاقب علشان ميتعودش علي كده من وهو في سن صغير
لكن كل الاعلاميين ليه مافتكروش يهاجموا احمد السيد بعد شتيمته للاعب التونسي 5 مرات متواصله وهو ظاهر علي شاشه التليفزيون في مشهد لازم كل اللي بيتفرجوا يعرفوا الشتيمه القذره اللي كان بيقولها احمد السيد لانها اتقالت 5 مرات ور بعض و المخرج كان فرحان بيها
ومطالبوش بعقابه و في لقطه عابره لبوجي والله في ناس كتير ما اخدتش بالها الا لما الاعلاميين اتكلموا وانا واحده منهم السكاكين طلعت
او في " ايه سفن ايه" الشهيره للنجم حسام عاشور حتي من كتر شهرتها البعض يدل الكلمه باسم حسام عاشور و طبعا كانت واضحه وضوخ الشمس علي شاشه التليفزيون ولم ينتفض شخص من الاعلاميين المبجلين لطلب عقوبه
وطبعا كابتن منتخب مصر بعد هجومه بالسباب اللي شفناه وسمعناه للحكم بعد مباراه الاهلي وانبي وطبعا طلع علينا الاخوه الاعلاميين يدافعوا عن احمد حسن وانه كان بيفهم الحكم غطلته !!!
ومع السقطات الكثيره للاعبي الاهلي مش بنشوف لجنه مسابقات او اتحاد كوره او اي حد يوقع اي عقوبه علي الاعبين لكن مع لعيبه الزمالك قبل اليوم ماينتهي العقوبه تكون اتقررت
زي بوجي صعب عليهم ينام فرحان بعد المباراه ياسبحان الله اتجمعوا وعملوا عليه عقوبه
حتي انا بقول لبابا تاني يوم الصبح - وهو اهلاوي جدا-
انا : بوجي اتعاقب
بابا : مين اللي عاقبه وليه
انا : علشان شتم بعد الجون الاول ومين بقي معرفش اتحاد الكوسه ولا لجنه خايف عزت " لان بجد مش عارفه مين اللي عمل العقوبه"
بابا: وهو ماله اتحاد الكوره ولا لجنه المسابقات بكاس العالم للشباب
انا : وانا ايه عرفني ماهو علشان زمالكاوي لازم يبقي ليهم علاقه
حتي بابا اهلاوي لاحظ ان في ظلم وقع علي بوجي من مسؤلينا الحُمر
نفس اللي حصل مع بوجي حصل مع عمرو ذكي
الكل نسي ان بسبب عمرو ذكي صعدنا للمباراه النهائية في كاس الامم الافريقية 2006 وفاكرين بس ضربه الجزاء لحلواني الكره المصريه - علي رأي الرخم عصام عبده اللي بلاش اتكلم علي تعليقه-

ياتري في حد من الاعلاميين مستني جمهور الزمالك يساند المنتخب

ياتري مستنيين لاعيبه الزمالك تقدم شئ للمنتخب

حد من الزمالكاويه مستني لاعب بعد كده يختار الزمالك علي الاهلي لو في مفاوضات من الناديين

ياتري الاعلاميين الافاضل متخيلين هيبقي العلاقه في المنتخب عامله ازاي متخيلين هتبقي العلاقه في المدرجات عامله ازاي انا متخيلاها هنلاقي المدرجات متقسمه علي عدد الانديه اللي منها لاعيبه المنتخب وكل جزء قاعد فيه مشجعيه باعلام ناديه وبيشجع ناديه او اللاعب اللي من ناديه وبيفصل بينهم امن علشان متحصلش مشادات هو ده هيبقي حال منتخب مصر

انا مش عارفه اعبر عن اللي جوايا مش عارفه ارتب افكاري بقالي اكتر من نصف ساعه بس اانا عارفه ان كل زمالكاوي فاهمني وكل اللي جاي في بالي دلوقتي جملة قرأتها في احد المنتديات
" اصل الثورة قامت واحنا مـــن مـــخلفات المــلكــ "

لكــ الله يا زمـــــالكــــــ

ومبروكـ علي الاهلي " ابو تريكة و ابو ضفيره"

لاااااا دي الحاله بقت مستعصيه اوي

في منتدي Zamalek.tv في يوم حطيت توقيع فيه صوره Taylor Swift

الصوره مفيهاش اي حاجه منافيه للاداب

لاقيت حد باعتلي PM وبيقولي ياريت تشيلي الصوره علشان منافيه للاداب وللاسلام

قلتله انا حره الصوره مفيهاش حاجه منافيه للاداب ولا للاسلام - طبعا لو حطتلهم شوال اسود دي هتبقي كويسه اوي -

المهم بعديها بساعه لاقيت الصوره اتشالت من التوقيع ومكتوب - صوره مخالفه الاداره -

قلت يمكن مخالفه علشان الفستان مفتوح شويه بس يعني مين المريض اللي هيفضل يدقق في الصوره علشان يستثار من الفتحه اللي انا والله مكنت واخده بالي منها دي اللي انا شايفاها عاديه ومفيهاش حاجه

المهم كبرت دماغي وغيرت الصوره الاسبوع اللي فات من فرحتي بعوده Kim Clijsters حيطت صوره ليها وكتبت تحتها welcome back ,Kim وحرصت وانا بنقي انها تكون صوره مش منافيه للاداب بتاعتهم علشان اخلص واريح دماغي اختارت صوره مفيهاش الا وشها وذراعها وبس علشان محدش يقولي كل ماحد هيبص للوصوره هتاخدي ذنوب

النهارده و المفاجاة الكبري لاقيت الصوره اتشالت !!!!!

ليه وعلشان ايه اكيد علشان مخالفه ايه اللي مخالف فيها

دي مفيهاش غير وش للدرجه دي ياعيني الرجاله مش قادرين يمسكوا نفسهم من انهم حتي يبصوا في وش واحده

وبعدين دي الصوره مفيهاش اي حاجه مثيره ايه المثيره في وش وذراع واحده بتلعب serve هي هتركز في الكوره اللي بتلعبها ولا انها تبين جمالها وانها مثيره وكمان الصوره بعيده يعني علشان حد يشوف وشها كويس لازم يكبرها الاول

للدرجه دي وصلنا ان اي خيال واحده يثير الرجاله للدرجه دي ويريلوا عليها للدرجه دي اختزلتوا المرأه في مجرد جسد

رقاصه - ممثله - لاعبه - دكتورة-وزيرة - مدرسه - سفيره-اميره - ملكه بقت يبتص عليها وتتعامل علي انها جسد بس بتريلوا اول ما بتشفوها

حسبي الله ونعم الوكيل فيكم و في اللي انتوا ماشيين وراهم من مشايخ مملكه الظلام المشكله الحقيقيه بقي مش في كده لا ان المنتدي بيتقال فيه افظع الالفاظ ولا كأننا واقفين في اقذر منطقه فيكي يامصر وكل واحد يشتم تلاقي في توقيعه ايات قرءانيه و احاديث وياعيني بيتأذي من صور المرأه العوره الل سبب البلاوي والصور بس هي اللي حرام لكن الالفاظ اللي بتتقال اللي بتكسف اي بنت عنيها تقع عليها حلال حلال حلال مدام مفيهاش صور نساء

وفي خبر عن نادي الجونه كان فيه صوره للمتحدثه الرسميه للنادي "ميار عبد العزيز " كان كل التوبك عباره عن مباراه في العبارات الجنسيه بين الاعضاءوطبعا اللي استفز المشرف العبقرينو صوره ميار وشالها من التوبك وساب المباراه ماشيه زي ماهي كأن اللي حرام بس هي صوره ميار

وعمار يامصر لما العقول اللي فيكي بالشكل ده

وعمار يامصر برجالتك اللي كلهم بقوا حيوانات بتتحكم فيهم غريزتهم

الحل الوحيد لتفادي الحذف هو زي التنس الشرعي لاحترام مشاعر الحيوانات العربيه

كل عمل ابن ادم له الا الصيام فهو لي

حملة امنيه توقف المجاهرين بالصيام لاول مره في مصر

كل عمل ابن آدم له إلا الصيام فإنه لي وأنا أَجْزي به

ده كلام ربنا كل اللي بيعمله الاسنان في الارض سواء خير او شر

ده للانسان بياخد بيه سيئات وحسنات زي ما كل دين موضح لمتبعيه ايه الحلال و ايه الحرام

و الحلال بين و الحرام بين

الا الصيام فهو علاقه بين الله و بين البشر داخل فيها حب من العبد وربه مدام بتحب ربنا يبقي هتعمل الحاجه اللي يأمرك بيها و اللي هو بيجزي عليه بكل حب وراحه نفسيه

لكن لو كنت انت مغيب مش بتحب ربنا او مش شياف ان الصيام نوع من انواع التعبير عن الحب لربنا

وقررت تفطر بردو دي علاقتك بربنا لان هو اللي قال " الصيام لي وانا اجزي به"

ولكن لما نلاقي مصر بدأت تتدحول لاماره سعوديه او افغانيه وبتقبض علي المجاهرين بالافطار

ياتري ده حقهم مش هتكلم في قوانين -انا ماليش دعوه بالقوانين -لكن في الشرع ده حقهم

في نص في القرءان بيقول ان المفطر يتحبس ولا يدفع غرامه ولا يتجلد زي مثلا السرقه و الزنا وشرب الخمر

ولا ربنا هو قال هو اللي بيجزي علي الصيام

واحد مغيب مش عايز يطيع ربنا مش بيحب ربنا هنرغموا ولا احنا نحب نعيش كل حياتنا تمثيل في تمثيل

نقاب وحجاب و في المقابل قله ادب وسفاله

صلاه وصوم بالمظهر مش بالقلب و في المقابل بردو قله ادب وسفاله وجهل وكل الصفات القذره اللي في الدنيا

ربنا مدي للناس رخص علشان يفطروا بيها افرضوا مريض سكر تعب فاجأه ووجب عليه يفطر وياخد ادويته

ام حامل مستحملتش الحر و الصيام وتعبت واضطرت تفطر في الشارع

هنقول لربنا لاااااااااااا مش هنستخدم رحمتك هنرفض كرمك وحبك لينا علشان دي مجاهره بالافطار

هي الرخص مش علي كل المسلمين ولا هي خاصه بس بالمنتخب

وياتري المنتخب كله هيتقبض عليه بعد ما فضلوا يقنعوا فيهم اكتر من اسبوع انهم يفطروا بحجه رخصه السفر

وبعدين ياتري مش احنا بردو دوله مدنيه عايشين مسلمين ومسيحيين مع بعض

ازاي نقهر حقوق المسيحيين علشان خاطر المسلمين ربنا هو اللي مديهم الحق انهم يفطوروا واحنا صايمين

طول عمرنا عايشين كده

طول عمري في المدرسه عندي اصحابي المسيحيين واحنا بنبقي صايمين وهما فاطرين

ومع ذلك كانوا بيراعوا شعورنا -مع ان دي مفيهاش حاجه تضايق مش خلاص هنموت علي الاكل - من نفسهم ومش بيرضوا ياكلوا ولا يشربوا قدامنا

واعرف ناس كتير زيهم كده

يعني هما من نفسهم بيراعوا شعورنا منغير مجاهره بالافطار ولا غرامه بيراعوا شعورنا بكل الحب و التسامح

لكن دلوقتي ولا هيراعوا شعورنا ولا هيبقي في حب وتسامح

للدرجه دي السعوديه قدرت تأثر علينا للدرجه دي اسلام محمد حسان وحسين يعقوب و الحويني انتشر بينا

للدرجه دي نسينا اننا كنا في يوم من الايام وسطيين ولما كنا وسطيين كان علمنا وحضارتنا وخيرنا مغرق كل البلاد العربيه بما فيهم مملكه التشدد و الجاز العظمي ( السعوديه )

ياتري دي مقدمه لهيئه الامر بالمعروف و النهي عن المنكر

مستنين اعلان ان مصر بقت دوله دينيه علشان نرتاح لاننا مبقناش عارفين هي دينيه ولا مدنيه ولامهلبيه

ومبروك علينا ناس بتصوم خوف من الشرطه مش من ربنا

رب قبل الفطار هو رب بعد الفطار هو رب طول السنه

اشهر الجمل و السلوكيات اللي بسمعها وبشوفها في رمضان من يوم مابدأت افهم وبصراحه بتنرفزني

-صلاه الفجر الشارع مليان بالمصلين ماشاء الله الصلاوات الخمسه الجوامع علي اخرها

كل الناس ماشيه في خشوع وكل واحد مالهوش دعوه الا بنفسه بنتكلم مع بعض بادب جامد مش بنغلط في بعض كل ده علشان احنا في رمضان

- مش هرد عليك دلوقتي انا هرد بعد الفطار

- الحمد لله اننا دلوقتي بعد الفطار علشان اعرف ارد عليك كويس

- احنا في شهر كريم حرام اللي بتقوله ده (رد علي حد بيشتم)

- انا مش بدخل في مناقشات علشان مش عايز اغلط في حد واحنا في شهر كريم زي ده

وغيرهم وغيرهم من الجمل المتشابهه كلها جمل معناها واحد

اننا حرام نشتم حرام نعاكس حرام نغتاب حد حرام نرمي حد بالباطل بس في رمضان وعند البعض قبل الفطار

طيب هو ربنا موجود في رمضان بس

ربنا موجود قبل الفطار وبس

ايه حكمه رمضان ؟؟ ليه عندنا رمضان ؟؟ كنت زمان فاكره ان رمضان ده علشان نحس بالفقراء وبس

لكن لما فهمت عرفت ان ربنا عايزنا نحارب نفسنا

ربنا بيحبس الشياطين في رمضان ولكن بيفضل احنا واحنا العن من الشياطين

وربنا بيدينا فرصه ذهبيه اننا نسلسل الشيطان اللي جوانا ونعيش في ايمان حقيقي وبجد مش ايمان النقاب و الذقن الطويلة

لكننا بنستغل كل فرصه ربنا بيدهلنا استغلال غلط كاننا بنمثل علي ربنا وبعد ال30 يوم ما يخلصوا دورنا بيخلص وبنرجع زي ما كنا ويمكن اسوأ واوقات بنرجع علي طول بعد الفطار

ربنا فعلا مدينا فرصه ذهبيه علشان نقيم ونعدل من نفسنا لان الانسان محتاج 21 يوم علشان يقدر يغير من سلوك معين بيعمله ويتعود علي سلوك جديد واحنا قدامنا 30 يوم نتعود علي سلوكيات جديده وجميله ونخلي حياتنا جنه لكننا فاكرين ربنا قبل الفطار وناسيينه بعد الفطار فاكرينه في رمضان وناسيينه باقي السنه

ربنا يهدينا ونستغل كل فرصه ربنا بيدهالنا

ياريت كل اب زي ونيس وكل بنت زي هدي كنا قضينا علي كل عبد الخالق

عاده في رمضان مش بتفرج علي مسلسلات كتير ومش بحب اجري ورا المسلسلات لانها بتقي حاجه رخمه وجود اكتر من 120 مسلسل مابين مصري وخليجي و سوري وانا بحب الفن جدا سواء كان مصري او خليجي او سوري
لكن في رمضان بختار مسلسلين بس اتابعهم ومعاهم برنامج واحد بس
وعادة اختياراتي بيكون في واحد منهم معروف و التاني بختاره علي حسب الاعلانات
وكل سنه بيبقي الاختيار الاساسي هو مسلسل نور الشريف بقالي فتره طويلة وهو ده اختياري الاساسي في رمضان وبعديها بختار مسلسل تاني او احيانا بكتفي بفن نور الشريف
لكن السنه دي الاختيارات اختلفت وبقي عندي مسلسلين اساسيين واختلف الترتيب بعد ما كان نور الشريف
بقي رقم 1 محمد صبحي ورقم 2 نور الشريف
ومش مهم مين الاول ومين التاني المهم انهم الاتنين اكتر فنانين انا بحبهم
لانهم اكتر فنانين بيعجبني تمثيلهم واداؤهم و المواضيع اللي بيختاروها لكن اللي بيعجبني اكتر هو محمد صبحي لانه بيحاول يقدم المشكله و الحلول في نفس الوقت ومش حلول ومشاكل بس محمد صبحي بكل مسلسلاته و افلامه ومسرحياته انا بعتبرها احسن من الف محاضره للتنميه البشريه

مين ينسي سنبل وطموحه

مين ينسي الهمجي وصراع الخير و الشر اللي ضايع بينهم الانسان

مين ينسي ماما اميريكا وتنبأوه بالمستقبل

مين ينسي مسرحيه تخاريف ووجهه نظر وانت حر وغيرهم وغيرهم وغيرهم من الافلام و المسلسلات و المسرحيات

لكن طبعا اللي محدش يقدر ينساه هو يوميات ونيس بالخمس اجزاء

لاننا كلنا اتربينا عليهم وعلي نصائح بابا ونيس وماما مايسه لولادهم

لاننا كلنا شفنا في عيله ونيس عيلتنا وفي مواقف كتير قلنا ياااه ده كأنهم عايشيين معانا بالظبط
قدم مشاكل كتير في ونيس ومشاكل مهمه كان اول واحد يتطرق ليها منها ان المجتمع هو اللي مسؤل عن نظافه المكان اللي عايش فيه مش الحكومه وان كل واحد لازم يحافظ علي المكان اللي عايش فيه وميتمناش شئ هو ميعملوش
منها قضيه الابناء من امهات مصريات وحقهم في الجنسيه المصريه وغيرها من القضايا و الكتير من المواقف اللي اتعلمنا منها بطريقه بسيطه وسلسه وكوميديه
واختفي ونيس بعد ما جوز ولاده وكأنه افتكر انه كده رسالته انتهت قدم دليل في تربيه الابناء وتعاملهم مع المجتمع لحد ما اتجوزوا وافتقدنا ونيس و الحياه بتتحول من اسوأ لاسوأ ودلوقتي الحياه مش زي 10 سنين فاتوا وقت الجزء الخامس من ونيس
ولان محمد صبحي من اكتر الممثلين الواقعيين اللي بيقدموا اللي الناس عايشينه بجد قرر يرجع بعد 10 سنين كاملين علي امل منه انه يقدم ولو حلول بسيطه للمجتمع رجع للمجتمع ومشاكله اللي كبرت اوي وفاقت الحد
لحد النهارده 12 حلقه كل يوم يعرض اكتر من مشكله بتحصل جوه اسرته الصغيره لكن كل اللي بيحصل جوا الاسره الصغيره دي هو بالظبط اللي بيحصل في المجتمع الكبير

-دفن المواهب في الاطفال وقهر مواهبهم و القضاء علي احلامهم وطموحاتهم

- ان الغرب ميختلفش كتير عننا يمكن اسوأ لكن احنا اللي محتاجين شويه تنظيم

- مشكله الدروس الخصوصيه حتي في المدراس الاجنبيه

- الجشع و الطمع والاستغلال بدعوي ان الكل بقي يعمل كده ولازم نعمل كده علشان نعرف نعيش

- الجهل بالكمبيوتر و اللغات وان مش عيب ان الواحد طول ماهو عايش يتعلم

- سوء الظن بالناس و الاحكام اللي مالهاش اي اساس او دليل

- الانتخابات

- ان الحب مش عيب ولا حرام ومش عيب ولا حرام ان البنت تحب وتعرف اهلها وتصارحهم

- وكتير بس الاهم هو اللي كان في الحلقه 12

احترام المرأه و احترام الفن الراقي اللي مبقاش اي احترام منهم موجود

قدم مثال للمجتمع ككل في صور (( عبد الخالق )) ومثال للمجتمع كما يجب ان يكون في صوره (( ونيس وهدي و نادر))

اوامر سي السيد

3مشاهد لاتتعدي 10 دقائق اتلخص فيهم مجتمعنا كله الشباب صوره عبد الخالق اللي لازم يكون عليه الشباب في صوره نادر المجتمع المصري ككل وكلامهم اللي بيقال دايما في المواقف اللي زي دي وفرحه الاهل بالعريس اللي زي ده اللي (هيربي) سوري هيحافظ علي بنتهم في نصف المواجهه الاول و المجتمع المصري كما يجب ان يكون في باقي المواجهه
اي اب في المجمتع الحالي هيشوف عبد الخالق هو افضل راجل يتجوزه بنته لكن اللي ونيس عايزه اب بيفكر بيشوف مصلحه بنته فين مش يتخدع بالمظهر الديني المزيف علي رأي نادر

في جملتين اتنين جمله من عبد الخالق وجمله من نادر تبين الشباب المصري حاليا وتفكيره و الشباب
المصري لازم يفكر ازاي
لكن ياتري ده هيأثر في الناس؟

هيغير تفكيرهم؟
الفن رساله ومحمد صبحي بيقدم الرساله دي علي اكمل وجهه لكن ياتري حد هيسمع حد هيسمع كلمه هدي "ابويا علمني ازاي البس علشان مبقاش منحله علمني اتعلم علشان افيد البلد اللي انا عايشه فيها اللي انت عايزها تتخلف" كام بنت هتسمع وتعرف وتفهم مش اول واحد يقولها لبسك مش عاجبني حتي لو محترم جدا تروح تعم اللي هو عايزه حد يقولها اعملي كذا واعملي كذا تجري وتعمله من غير تفكير

وبجد اللي اعجبت بيه اوي في القضيه دي وفي اخراج محمد صبحي هي ملابس هدي اللي الاستاذ عبد الخالق مش عاجباه ملابس محترمه لابعد الحدود - علشان محدش يقول عايزين العري في المجتمع - بس محمد صبحي حب يقدم ان خلاص عقلياتنا بقت مبرمجه علي شئ واحد لو عنينا ماشفاتهوش يبقي كل حاجه في الانسان غلط

أنا كمان رافضه عبد الخالق وهستني نادر حتي ولو لاخر العمر

ليه مصر تكرهنا في الزمالك

ممدوح عباس انهي مفاوضات عودة كابتن الفريق جمال حمزه

للزمالك من ماينز الألماني وابراهيم سعيد يقترب وبقوه من العوده للفريق

عوده جمال حمزه للفريق معناها اعتزالي تشجيع كره القدم نهائيا

عمري ما كنت اتمني اني اقول كده علي تشجيعي للزمالك

لكن لما كل واحد يعمل اللي هو عايزه في الفريق

ويجيب اللاعيبه اللي هو بيحبها علشان بس بيحبها

يبقي خلاص الفريق ده بقي بتاع شخص واحد بس

مش بتاع جمهور الزمالك ككل

لما نرجع جمال حمزه بعد كل اللي عمله فينا

بعد ماكانت الجماهير بتتقطع واحنا بنافس علي الهبوط

وهو بيلعب بلياردو ورافض يروح التمرين

لما قال الزمالك واقف في طريق مستقبلي

وراح سافر المانيا وملمسهاش و المدرب بيهزقه

هيرجع لينا يعمل ايه غير ان في شخص هو المتحكم في الامور

وهيرجعه علشان بيحبه

وبكره نسمع ان هنري ميشيل هو اللي طلبه طبعا ماهو هيعرف منين وينفي ازاي

المدير الفني الاجنبي كم من الجرائم ترتكب باسمك

A Place In This World

بعشق Taylor Swift من اول يوم سمعتها فيه ( بالصدفه ) من سنه ونص تقريبا وكانت اول اغنيه اسمعها كانت Teardrops On My Guitar اللي بتحكي فيها تايلور - طبعا زي كل اغنيها - قصه حب حقيقيه هي مرت بيها من طرف واحد وهي في High School و في الاغنيه اسم الشخص الحقيقي اللي هي كانت بتحبه

Drew Hardwick




" Drew looks at me I fake a smile so he won't see, but I want, and I needed everything that we should be "

صوت تايلور و احساسها شدني اوي وقررت اني اتابعها وبقت واحده من مغنياتي المفضلات وبقيت بتابع وبدور علي اخبارها كل يوم وبقي اهتمامي بمتاعبتها اكتر من اهتماتي بمتابعه Dido - Shania Twain اللي مكنش في اي حد يقدر ينافس حبي ليهم لكن جت تايلور

المهم من كل الرغي ده اللي مش عارفه انا برغيه ليه :))

انا سمعت كل اغنيه ليها سوارء اغاينها او Covers لمغنيين تانين لكن كان فيه اغنيتين كنت متجالهاهم

واحده مهم لسه متجاهلاها لحد دلوقتي ومعرفش سبب التجاهل مني ده ايه

لكن التانيه قررت بكل شجاعه اني اسمعها علشان صعبت عليا بس :)

ولما سمعتها كنت هضرب نفسي لاني لاقيت الاغنيه دي اكتر اغنيه بتعبر عني واكتر اغنيه حسيت بيها

A Place In This World

بردو ايه الداعي من كل الرغي ده كله بالرغم من انها مجرد اغنيه لكن اتعلمت منها اني ماتجاهلش اي شئ ولو كان صغير ولا تافهه لانه ممكن الاقي نفسي فيه و طبعا هروح اسمع الاغنيه التانيه دلوقتي :)

النصب باسم الدين

بقالي كتير اوي مفتحتش المدونه اوقات بيبقي علشان مش لاقيه حاجه اقولها واوقات علشان اللي عايزه اقوله مش هعرف اعبر عنه واوقات علشان الموديه بتاعتي اللي احبه النهارده بكره بكرهوا و اللي كنت بكرهوا امبارح النهارده بحبه

كت عايزه اتكلم في حاجات كتير

طبعا كنت هتككلم عن شماتي في الاهلي اللي مش بقدر اخبيها حتي لو قلت اني مش شمتانه عنيا بتبقي كلها شماته

كنت عايزه اتكلم علي حبيبي ( الزمالك ) وعن فرحتي بماتش انبي و عن خوفي وقلقي من اللي بيحصل

وكنت عايزه اتكلم عن حوار دار بيني وبين ماما وقصه حصلت قدامي مع سواق تاكسي لكن الموديه بتاعتي منعتني من كل ده

لكن اللي شجعني النهارده تليفون تليفون جالي الساعه 12.30 مساءا اول ما خلصت صلاه الظهر لاقيت تليفون البيت بيرن

بصيت في الرقم معرفهوش ودار حوار بيني وبين نفسي - ياتري مين

ده ولا حد ليا ولا حد لاخويا ولا رقم شغل بابا ولا شغل ماما طيب ارد ولا لأ - اسأله غريبه اي حد التليفون بيرن بيرد من غير تردد لكن انا بسبب خوفي وقلقي وانطوائيتي مش بحب ارد علي حد ما اعرفهوش لاني بتلخبط في الكلام وشم بعرف ارد المهم قررت اني ارد

أنا : الو

الطرف الاخر: صوت بنت " الو السلام عليكم "

انا : وعليكم السلام ورحمه الله وبركاته

البنت : ده رقم تليفون الاستاذ ( اسم بابا )

انا : ايوه مظبوط مين حضرتك

البنت : حضرتك المدام

انا : لا بنته خير في حاجه

البنت : هنا شركه قناه الناس الاسلاميه

انا : تنحت - طبعا مش في التليفون - وقلت في سري وهي بتتكلم هو انا اهرب منكم في التليفزيون تطلعولي في التليفون

البنت لسه بتتكلم : احنا بنختار ارقام عشوائه علشان نقولهم علي عرض قناه الناس الجديد - وفضلت تقول مقاله بحالها كأنها حفظاها وخايفه تنساها مفهمش منها الا خصم علي موبايل ولو اشتريتي 5 منتجات مش عارفه خصم كام وفي الاخر قالتلي لو عند حضرتك عروسه بتتجهز ممكن نساعدها في اختيار الجهاز وممكن لو اشتريتوا 5 عروض هديه من الهدايا فرصه عمل لاي شاب مابين 18 - 35 سنه

ممكن لو حضرتك عجبك العرض اشرحولك بالتفصيل

انا : بعد مافقت من الغيبوبة اللي كنت فيها قلت في سري بعد المحاضره دي لسه فيه تفاصل ورديت عليها ميرسي جدا

و المكالمه خلصت

طبعا كان نفسي اهزقها و اهزق القناه الي هي تبعها لكن للاسف مكنش عندي الشجاعه الكافيه

المهم وجه الاستغراب اللي جالي من المكالمه اللي بقت المكالمات اللي زي دي عاديه جدا

هو الصاق كلمه الاسلاميه باسم قناه الناس

يعني هو فيه كام قناه ناس موجوده ولا هو استخدام كلمه الاسلاميه علشان الناس تسمع للاخر

الشئ التاني ايه كميه العروض و الهدايا و المغريات دي هي قناه اسلاميه زي ما هما بيقولوا ولا قناه اعلانات

وصلت بالقناه الاسلاميه الكبيره انها تعلق الناس في الهوا وتقولهم اللي هيشتري هيبقي ليه هديه فرصه عمل لشاب من سن 18 ل 35 سنه فين البيت اللي في مصر اللي مفيهوش شاب مش عارف يشتغل وبيدور علي شغل وبيتعلق بقشايه علشان يشتغل

وطبعا اول ما هيسمعوا كلمه الاسلاميه وفرصه عمل هبقول لا ده غير دي اسلاميه ياجدع ويجري يشتري منتجاتهم علشان اسمه يدخل السحب علي الشغلانه وياعيني لما مايطلعش في القرعه يقول معلش - مش هيقول كوسه ولا واسطه - هي بس معلش علشان دي الاسلاميه

وياتري يا قناه النس الاسلاميه ده ميعتبرش نصب

وياتري ياقناه الناس الاسلاميه منتجاتك عامله ازاي نفس جوده منتجات اخواتك اللي في باقي القنوات انا كان ليا تجربتين مختلفتين من شركات اللي بتقدم عروض في القنوات وكانوا الجهازين اللي اشترتهم بايظين ومكملوش اسبوع

ياتري يا اسلاميه منتجاتك جودتها ايه ولا بردو لازم تقولوا اسلاميه علشان لما نشتري و الحاجات تبوظ ولا تبقي حاجات سكه نقول قدر الله وماشاء فعل ده مش هنقول دول حراميه لا اصل دي قناه الناس الاسلاميه

من اول يوم فتحت فيها القناه دي وانا مش بطيقها حرمت علي اهلي انهم يتفرجوا عليها وحرمت علي اصحابي انهم يحكولي حاجه عنها لاني عارفه انها ظاهرها اسلاميه وباطنها نهابيه - جايه من النهب -

وافتكرت مسلسل الدالي العام الماضي لما بين حقيقه الشركات الاسلاميه اللي كانت موجوده زمان وانها مجرد عمليات غسيل اموال متخفيه في غطاء الدين

وللاسف الاسلام بدل ما هو دين للهدايه البعض اخدوه دين للكسب و النصب

الفن في أيد الاقزام هبل رسمي .. فهمي .. نظمي

كنت انا و اخويا بنعد كام اغنيه كاتبهم و ملحنهم الفذ الفلته سابق عصره و اوانه نجم الجيل - اللي اسمه تامر حسني اللي مش عارفه اقول عليه ايه مطرب ولا مهرج لانه ابعد عن الاتنين لان الاتنين ليهم قيمه عن اللي بيعمله الشئ ده و بالرغم من اني بكرهه كره العما الا اني بسمع البوماته علشان مبقاش بكرهه من غير سبب وبصراحه البومه الاخير مكانه الطبيعي سله المهملات ومن 15 اغنيه مفيش الا اغنيه واحده اللي هي الهيد - هعيش حياتي - وكمان كلامتها بس هي اللي حلوه ولا الحانها ولا توزيعها ليهم قيمه - المهم ارجع للموضوع اخويا قالي اسم اغنيه كنت هموت من الضحك علي اسمها المهم شغلناها اغنيه (رسمي نظمي فهمي ) او رسمي فهمي نظمي مش فاكره ومش عايزه افتكر الاغنيه ديو بينه وبين مطرب تاني

بس صوت المطرب مش غريب عليا صوته جميل جدا يدخل القلب علي طول بس مين ده اللي بيغني مع البعيد قلت ممكن يكون صوت من الاصوات الجديده اللي البعيد عاملي فيها موسيقي وقال هيكتشفهم قلت بس ده بيكتشف ناس اصوتها احلي منه بكتير

الاغنيه خلصت و الصوت لسه مش غريب عليا رجعت الاغنيه تاني الصوت هيجنني لاني واثقه اني عارفاه قلت لاخويا مين اللي بيغني معاه الاغنيه دي قالي - علاء عبد الخالق-

هو قالي الاسم وانا صوتت علاء عبد الخالق وايه اللي خلاه يعمل اغنيه مع الشئ ده ازاي علاء عبد الخالق يرضي علي نفسه يعمل اغنيه مع الشئ ده وكمان مش اي اغنيه اغنيه هبله زي دي

طبعا اخويا استغرب لانه ميعرفش مين علاء عبد الخالق وانا حاولت افكره بيه لكنه مقدرش يفتكره لانه كان صغير اوي وقت وجود علاء عبد الخالق وبالرغم بردو اني كنت صغيره وقتها بس طبعا انا عمري ما هقدر انسي - داري رموشك عني وداري -بحبك باستمرار بحبك طول العمر يا احلي ما في البيض واجمل ما في السمر(مع اميره)- قلبي طياره ورق قلبك طيرها لفوق- مكتوب ياحبيبي تاخدني مكتوب بهواك توعدني مكتوب اجي اقرب منك الالقيك انت بتبعدني - اقرب اغنيه لعلاء عبد الخالق لقلبي- وغيرهم وغيرهم من الاغاني اللي اتربينا عليها

في ظل خنقتني من اللي عرفته خصوصا بعد ما ركزت في رسمي نظمي فهمي ولاقيت الحانها وكلامتها متلقش بواحد زي علاء عبد الخالق

قلت لازم اعمل search اشوف ايه الحكايه

لاقيت خبر بيقول ((تامر حسني يعيد علاء عبد الخالق للغناء))

بعد غياب سنوات طويلة عن الوسط الغنائي يعود الفنان علاء عبدالخالق إلي الساحة الفنية عن طريق المطرب تامر حسني الذي قرر أن ينتج ألبوما له. - تامر حسني هينتج لعلاء عبد الخالق الفار هينتج للاسد اشمعنا دلوقتي بعد ما تامر بيه اعلن انه هيكتشف اصوات جديده صوت علاء عبد الخالق هيبقي بالنسبه لتامر اصوات جديده طيب ما دام انت عايز تنتج ماتنتج لنفسك ولا هي منظره علي المطربين الكبار علشان الناس يقولوا انك صاحب الفضل عليهم-
بدأت الفكرة حينما اتصل تامر حسني بعلاء واستفسر منه عن أسباب ابتعاده عن الغناء طوال السنوات الماضية مؤكداً له أن ألبوماته كانت مصدر الهامه وسعادته قبل أن يخوض عالم الغناء.
بينما أكد علاء عبدالخالق أنه لا يوجد المنتج المتحمس له.. وفي الحال قرر تامر أن ينتج له فوراً ألبوماً غنائياً. - فعلا المنتجين مش متحمسين لفنان اصيل ومتحمسين لهيفاء وهبي و نانسي عجرم وتامر حسني وسعد الصغير ياخساااره يافن-

اتفق تامر حسني أيضا علي أن يضم الألبوم أغنية مشتركة بينهما بعنوان “بحبك رسمي” كلمات وألحان محمد رحيم والذي يشارك تامر وعلاء الغناء في الأغنية والتي يطلق عليها الأغنية “التيربو” لمشاركة ثلاثة في أدائها.

للاسف انا مش عارفه اعبر عارفه اني مش عارفه اوصل احساسي كامل بس انا هتجنن مش عارفه اشكر تامر انه هيرجع فنان زي علاء عبد الخالق ولا اترحم علي المستوي الفكري و الثقافي اللي وصلنا ليه اللي يخلي قزم زي تامر حسني يتكرم ويتعطف علي فنان بحجم علاء عبد الخالق علشان يرجع علاء عبد الخالق وياتري مين بعد علاء عبد الخالق - هشام نور - خالد علي - او ممكن يفكر يعمل ديو مع هشام عباس علشان يرجعله بريقه تاني او هاني شاكر او مع محمد محي

اللي بيحصل الايام دي من تحكم الاقزام في الفن هبل رسمي - فهمي - نظمي

خطوة جيده في بلد لا يحترم المرأه :(

الجونة يُعين أول سيدة متحدث رسمي لنادي مصري

قرر نادي الجونة تعيين ميار عبد العزيز متحدث رسمي باسم النادي لتكون أول سيدة تتولى هذا المنصب في مصر.وتشغل عبد العزيز منصب مدير التسويق في النادي الصاعد حديثا للدوري الممتاز، قبل تعيينها متحدث رسمي باسم النادي. إلى ذلك، قال حمزة سليم رئيس مجلس إدارة نادي الجونة لـFilGoal.com إنه سيعقد مؤتمرا صحفيا خلال الأيام المقبلة للإعلان كافة التعاقدات وما يتعلق بالنادي.وأضاف سليم أن الفريق سينطلق في الأسبوع الثاني من يوليو إلى سويسرا لإقامة معسكر الإعداد للموسم الجديد.وأوضح سليم أن الفريق سيخوض ثلاث مباريات في هذا المعسكر.

http://www.filgoal.com/Arabic/News.asp?NewsID=57335

ــــــــــــــــــــــــــــــــــــــــــــــــــــــــــــــ

فرحت جدا بالخبر ده اعتقدت انه بداية لعهد جديد لتقدير دور المرأه في المجتمع وبصراحه خبر زي ده معمليش صدمه زي الكتير من الناس لان شئ متوقع من -ال ساويرس- انهم يعملوا شئ مش مألوف لكن بعد ما فرجت جدا وحسيت اننا هنبدأ نحط رجلينا علي اول سلمه منالاحترام وتقدير المرأه صفعت من التعليقات علي الخبر في المنتديات المختلفه مابين ردود اقل ما يقال عليها انها -مش مؤدبه 0- ومابين تجاهل تام وعرفت اننا عمرنا ما هنتغير ابدا وهنفضل طول عمرنا مجتمع ذكوري مفيش اي احترام للمرأه يمكن صدمتي كانت كبيره علشان انا فرحت جدا وماخدتش بالي ان الفرق النسائيه في مصر محدش يعرف عنها حاجه و المشجعين لما يحبوا يهزقوا لاعب بيشبهوه بالنساء وكأنها فعلا شتيمه زي حسن مصطفي الجماهير مسمياه - سوسن -

جمال حمزه -جمالات- شادي محمد -شادية- او حتي يشتموا اللاعبين انهم يندهوا عليهم باسامي زوجاتهم كأن زوجاتهم دول عار عليهم زي الهتاف الشهير اللي ابتدعوا جماهير المحله ضد شادي محمد (ساره يا شادي) بالرغم من كرهي الشديد لشادي محمد لانه غلط اكتر من مره في الزمالك وفي جماهير الزمالك الا انه ضايقني جدا

المهم ده جانب من التعليقات اللي شفتها واحبتطني وعرفت اننا عمرنا ماهنتقدم ولا خطوه طول ما احنا عايشين في مجتمع زي ده

*يا جماعة افهموا .. اسمها الجونة .. يعنى مؤنث .. عشان كده جايبين واحدة ست ....
7لو كان اسمهاالجون كان الوضع اختلف طبعا ... مش محتاجة نباهة يعنىانشر يا حبوب ياما بكرة نشوف .....

*
إزاى
5كنت منتظر إن كل هيعارض القرار ده ولكنى فوجئت بأن هناك من يؤيد القرار وأبين لهم حديث الحبيب محمد صلى الله عليه وسلم فيما معناه لا خير فى أمة ولت عليها نسائها وهو ما سيثبت فى نهاية الموسم رغم إعترافى بأن الجونة صاحب أفضل صفقات هذا الموسم ولكن القائل هو الذى لا ينطق عن الهوا (بصراحه انا مشفتش حد مؤيد الخبر الا القليل جدا جدا وبصراحه الحديث ده مش عارفه ايه صحته لكن انا مره سمعت تفسير للحديث ده انه كان علي موقف معين مش قاعده عامه في الحياه)

*أول سقطة
2هذه هى أول سقطة لهذا الفريق الذى توقعت نجاحه بشدة بعد الصفقات النار اللى هو قاعد يجيبها ولكن كدة معتقدش

1سيدة متحدث رسمى ...هههههههههههههههههواضح ان الجونه جاى يستعرض السنه دى ...

ايوه كده طروا على قلبنا .. الدورى كده يحلو

- رد علي الكومنت - يطروا ايه بس .. ده تلاقيها شبه انعام سالوسه

ده هيكون سبب لزيادة شعبية النادى

علشان كده اللعيبه بتوقع علطول

نحو مزيداً من التطرية في النادي

العبى يا ميار

اه يا نادي مفهوش راجل

اصل مفيش رجاله باين في الإداره

- كأن الرياضه حكر بس علي الرجاله -

الوليه دي كام سنه

- وليه منتهي الأحترام -

طيب ياريت نقابلهم بقى فى معسكر سويسرا هيبقى احتكاك ممتع اوى - اقل شئ يتقال منتهي السفاله-

دى هتقعد على الدكه تبص للحكم ضربات الجزاء هتبقى اسهال - مش عارفه اقول ايه بجد سفاله وعدم احترام لابعد الحدود-

هتلاقيها حاجة كدا زي الست بتاع النيل للرياضة بين البينين وكل اكسسوارتها تبقي ضنابل وتلبس صفارة بدل السلسلة وهنشوف ايام سودا

في الاخر احب احط بعض الردود اللي لاتتعدي 1% من مؤيدين القرار و بيعبر عن احترامهم للمرأه لكن 1% هيقدروا يعملوا ايه في مجتمع زي ده بالرغم ان اغلبهم بنات :)

شياكة - ندا
أراهن .......... خلال خمس سنين ستكون حواء متحدث رسمى باسم نصف أندية الدورىاسلوب شيك لتقديم نادى مجهول للجميع و لا أستبعد على ساويرس أن يقوم بتلك الخطوة الجريئة

ايمي - بطلوا الفكر الرجعى بتاع زمان دة , الستات والبنات دلوقتى بيشاركوا فى كل حاجة مش فى الكورة

عفوا ........انه فكر جديد
4اعتذر لكل زملائى لكن هذه الخطوه تؤكد فعلا ان فريق الجونه صعد للمتاز باداره تملك فكر جديد واسلوب جديد وبجد الفريق ده مش هيكون زى كل الفرق اللى بتصعد وتهبط .....

قرار ممتاز
3صدقوني قرار ممتاز منتهي التحضر والحرفية مادام متمكنة في شغلها بعيدا عن انها امرأة أو رجل ، لكن ممتازة في شغلها يبقي خلاص ، ربنا يوفق فريق الجونة ونشوفه من الفرق اللي تشعلل الدوري

فريق محترم جدا واللهفاضلهم بس يظبطوا استاد الغردقة دة و هيبقوا احسن من 99% من اندية الدوري الممتاز

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

منتهي عدم الاحترام و الاستفزاز كأن الحياه كلها معموله للرجاله و الستات عليهم يقعدوا في البيت يستنوا سي السيد لحد مايرجع علشان يحطوا رجليه في مايه وملح وياريت بس التعليقات علي احتقار المرأه كده وبس ده في نظر الرجاله ان المرأه اللي تتجرأ وتشتغل ولا تظهر في التليفزيون ولا تخرج من بيتها يبقي حلال فيها الشتيمه و التلميحات الجنسيه الوقحه انا مش عارفه اعبر عن اللي جوايا لاني شفت تعليقات كتيره خصوصا في المجال الرياضي لاني مهتميه بيه جدا علي مدي تحقير المرأه وياسلام لو في صحفيه كتبت خبر علي نادي اغرب تعليق شفته تعليق علي خبر كاتباه صحفيه اسمها -رحاب حمدي في جريدة اليوم السابع - علي اخر الزمن هناعرف اخبرنا من النسوان !!
انا حاسه اني عايزه اضرب اي راجل دلوقتي حاسه اني عايزه انزل الشارع و اضرب اي راجل الاقيه قدامي لاني تعبت وزهقت من المجتمع المقرف اللي احنا عايشين فيه

في الاخر بالتوفيق للاستاذه ميار وان شاء الله هتنجح وهتسكت كل الالسنه اللي عايزه قطعها